Cipolwg Cyntaf ar Argraffiadau'r Arlunydd ar gyfer Venue Cymru

Cipolwg Cyntaf ar Argraffiadau'r Arlunydd ar gyfer Venue Cymru

Argraffiad Arlunydd ar gyfer Venue Cymru

Mae Cyngor Bwrdeistref Sirol Conwy yn falch o rannu cipolwg cyntaf ar argraffiadau’r arlunydd ar gyfer y cynigion cyffrous ar gyfer Venue Cymru, Llandudno.

Mae’r delweddau newydd yn cynnig cipolwg ar ddatblygiad arfaethedig Venue Cymru.  Maen nhw’n arddangos lle wedi’i drawsnewid sy’n ceisio gwasanaethu’r gymuned leol, defnyddwyr y llyfrgell, ymwelwyr, gweithwyr diwylliannol a defnyddwyr y theatr yn well.

Mae argraffiadau’r artist wedi’u cynnwys mewn adroddiad y bydd yn cael ei gyflwyno i’r Pwyllgor Trosolwg a Chraffu Economi a Lle yr wythnos nesaf. Gofynnir i Gynghorwyr ystyried y cynigion drafft a gwneud argymhellion i’r Cabinet.

Bydd yr adroddiad hefyd yn cynnwys canlyniadau'r Ymgynghoriad Cyhoeddus am y Llyfrgell a'r adroddiad effaith economaidd amlinellol am y bwriad o symud Llyfrgell Llandudno i Venue Cymru.

Bydd y broses o ail-ddylunio yn helpu i ddiogelu’r llyfrgell ardal a lle Venue Cymru fel prif gyrchfan diwylliant a digwyddiadau yng ngogledd Cymru.

Yn ogystal â darparu cyfleusterau modern a gwella hygyrchedd, bydd disgwyl i’r gwaith o leoli’r Ganolfan Groeso a’r Llyfrgell Ardal gyda’i gilydd arwain at arbedion cost o dros £100,000 y flwyddyn.

“Mae gweld argraffiadau’r artist yn garreg filltir gyffrous i’r prosiect,” dywedodd Pennaeth yr Economi a Diwylliant Conwy, Sarah Ecob, “mae’n helpu i wireddu ein gweledigaeth ac mae’n dangos ein hymrwymiad i greu canolbwynt diwylliannol sy’n gynhwysol, modern ac sy’n addas ar gyfer y dyfodol.”

“Mae’r cynigion hyn ar gyfer Venue Cymru yn rhan o strategaeth ehangach i ddiogelu gwasanaethau hanfodol a chefnogi twf economaidd, datblygiad diwylliannol a thwristiaeth yng Nghonwy.”

Dywedodd y Cynghorydd Dilwyn Roberts, Aelod Cabinet Diwylliant Conwy: “Mae’r gwaith ailddatblygu hwn yn fuddsoddiad sylweddol ym mywyd diwylliannol ein rhanbarth. Mae Venue Cymru wedi bod yn gonglfaen o ran ein celfyddydau ac adloniant ers amser maith. Nod y cynigion cyffrous hyn yw sicrhau ei fod yn parhau i ysbrydoli ac ymgysylltu â chenedlaethau'r dyfodol a sicrhau dyfodol y llyfrgell ardal. Rwy’n gobeithio y bydd Cynghorwyr yn cefnogi’r prosiect hwn, sy’n addo dathlu creadigrwydd, dod â phobl at ei gilydd a chryfhau hunaniaeth ddiwylliannol ein cymunedau.”

Ychwanegodd y Cynghorydd Nigel Smith, Aelod Cabinet Economi Gynaliadwy: “Rwy’n falch iawn o gefnogi’r buddsoddiad hwn yn Venue Cymru, oherwydd bydd y prosiect yn rhoi hwb i’r economi leol. Bydd y gwaith arfaethedig yn cynnal a chreu swyddi yn y tymor byr ac yn helpu i ddiogelu a datblygu swyddi yn y dyfodol. Bydd yn rhoi gwell mynediad i’r celfyddydau a diwylliant, i gyd o dan yr un to, ond yr un mor bwysig â hyn, bydd yn helpu i gynnal Venue Cymru, sy’n lleoliad annwyl iawn i ni, y Gwasanaeth Llyfrgell a Chanolfannau Croeso, er budd ein holl breswylwyr ac ymwelwyr”

Mae’r adroddiad a’r cynlluniau ar gael i’w gweld ar wefan Conwy yn: Democratiaeth Lleol Conwy : Agenda ar gyfer Pwyllgor Trosolwg a Chraffu Economi a Lle Dydd Mercher 2 Gorffennaf 2025, 5.30 pm

Mae’r Achos Busnes drafft ar gyfer cyllid wedi’i gyflwyno i Lywodraeth y DU. Bydd cynlluniau terfynol yn amodol ar gymeradwyaeth Cynghorwyr. Bydd modd gweld y cynlluniau yn Venue Cymru, y Ganolfan Groeso a Llyfrgell Llandudno dros y misoedd nesaf.