Adnoddau newydd i gynorthwyo plant a theuluoedd yng Ngogledd Cymru

Adnoddau newydd i gynorthwyo plant a theuluoedd yng Ngogledd Cymru

llesgogledd.cymru

Mae gwefan newydd sy’n cefnogi lles plant a phobl ifanc yng Ngogledd Cymru wedi cael ei lansio yn yr Eisteddfod Genedlaethol yn Wrecsam.

Mae llesgogledd.cymru yn cynnig cymorth hanfodol i hybu iechyd emosiynol a gwytnwch teuluoedd – ac mae’n cynnwys llawer o syniadau i helpu’r genhedlaeth nesaf i dyfu, datblygu a ffynnu. Wedi’i ysbrydoli gan y Pum Ffordd at Les, mae’r wefan newydd yn annog plant, pobl ifanc a’u rhieni neu ofalwyr i chwilio am ffyrdd y gallant gysylltu ag eraill, bod yn egnïol a chymryd sylw o’r byd o’u cwmpas. Mae hefyd yn gwahodd teuluoedd i ystyried sut y gallant barhau i ddysgu a rhoi eu hamser i gefnogi eu cymuned.

Mae adran bwrpasol y wefan Archwilio’r tu allan yn cynnwys map chwiliadwy o gyrchfannau, traethau, meysydd chwarae, coedwigoedd a theithiau cerdded – gan helpu teuluoedd i ddod o hyd i leoedd iach a hwyliog i blant a phobl ifanc chwarae yn yr awyr agored.

Fe’i lansiwyd yn swyddogol ar y Maes gan Fôn Roberts, Cadeirydd Bwrdd Partneriaeth Rhanbarthol Plant Gogledd Cymru a Chyfarwyddwr Gwasanaethau Cymdeithasol Cyngor Sir Ynys Môn, yn dilyn perfformiad arbennig ar thema lles gan y grŵp dawns cymunedol Dawns i Bawb.

Dywedodd: “Mae’n bleser mawr lansio ein gwefan newydd Iechyd Emosiynol, Lles a Gwytnwch Gogledd Cymru – adnodd bywiog a chynhwysol i blant, pobl ifanc, teuluoedd a gweithwyr proffesiynol ledled Gogledd Cymru.

“Mae hyn yn ganlyniad gwaith cydweithredol drwy’r Bwrdd Partneriaeth Rhanbarthol Plant a chyda Swyddogion Chwarae o bob rhan o Ogledd Cymru, ac mae wedi cael ei siapio gan ein Fframwaith Iechyd Emosiynol, Lles a Gwytnwch a rennir. Yn hanfodol, mae’n seiliedig ar brofiadau a lleisiau plant, pobl ifanc, teuluoedd a’r gweithwyr proffesiynol profiadol sy’n gweithio gyda nhw.

“Rwy’n siŵr y bydd llawer o rieni prysur wir yn croesawu rhai o’r gweithgareddau gwych sydd wedi’u cynnwys yn yr ardal Archwilio’r tu allan – yn enwedig cyfleoedd i fanteisio i’r eithaf ar yr adnoddau naturiol a chwarae gwych sydd gennym ar draws Gogledd Cymru yn ystod gwyliau’r haf!

“Ond rydym yn gobeithio y gall pawb dderbyn y gwahoddiad hwn i fyfyrio, archwilio a darganfod cyfleoedd newydd i hybu iechyd emosiynol, lles a gwytnwch ein cenhedlaeth nesaf yma yng Ngogledd Cymru – p’un a ydynt yn unigolyn ifanc sy’n delio â newid, rhiant neu ofalwr sy’n cefnogi plentyn, neu’n weithiwr proffesiynol sy’n arwain eraill.”

Mae’r wefan newydd wedi’i datblygu gan bartneriaid o bob rhan o Ogledd Cymru, gan gynnwys ysgolion ac addysg, iechyd a gwasanaethau plant.